11- GOEIEMORRENG DRENTE EN UMGEVING, HIER IS PIET SCHILLEBOER

Wij, en daor bedoel ik de meensen van mien leeftijd met, wij dus, wij beleeft moeilijke dagen, luusteraars.  Hele moeilij­ke dagen. Niet allent umdat de harfst zien intrede edaone hef, want dat valt ok niet met aj rond de veertig bint, nee, ik doele op de staking in het onderwiejs vandaage. Wij van mien leef­tied bint veuls te vrog geboren. Nooit heb ik het maggen metmaken dat mien meesters of juffen staakten.  En wat heb ik dat vaake eweenst. Hooguut staken ze wel ies arrengs een stokkie veur. As wij as kiender  bijveurbeeld een vuurtie staakten. Of is het nou Vuurtie stook­ten ?. Moeilijk heur, oons Drents en dat Neder­laands.. Die onderwiejzers enzo die mut vollengs mien zeuntie veule vaker de koppen bij mekaar staken ... Kunt ze zokke  stakings trouwens niet in de ve­kaansies organi­seren ?  Dan maakt ze ok duud­elijk dat ze der wat veur aover hebt. Dat ze bijveur­beeld in de harfstvekaansie gewoon een weeke veur de klasse bliejft zit­ten in plaats van met de caravan op stap. Of in de krokusve­kaansie, of in de paosvekaan­sie of in de pink­sterve­kaansie of in de karstve­kaansie of in de grote vekaansie of gewoon op een vrije woens­dagmid­dag ofzo ?  Of gewoon nao drei uure massaal nao­bliejven...Mar laok er mar aover ophool­den want zij luustert natuur­lijk ok allemaole nog naor de radio nou as ze toch bij huus bint en dalijk begunt het gebel weer dat ze't zo moeilijk hebt met mien kiender.  Nou, ik ok en ik staake ok niet...

't Was ok allemaole  ellende van de weeke. Uut de Emmer die­rentuune hebt ze bijveurbeeld krokodillen esteulen. 't Zul mij niks verwondern of binnenkort leeze wij in de kraante dat een visser in de Hoogeveense Vaort bij Nieuweroord of Klazinaveen een krokodil evungen hef. Daor kuwwe op wachten zuk haoste zeggen...

De Partij van de Arbeid was op werkbezoek in Drente. Ik viene dat een raar woord: werkbezoek. Het is een beetie een tegen­striedig woord. Echt zo'n deur de politiek bedacht woord dat goed klinkt mar veule meer liekt dan het is. Thijs Woltgens was in Assen in de wijk Pittelo. En wat lees ik dinsdag in de Drentse kraante ?: Dat Woltgens ezegd hef ; OPLOSSING PITTELO KOMT ERAAN". Ja, dat wussen ze in Pittelo al lange. En as het zo deurgiet dan lost Pittelo inderdaod vanzullef op vanwege de rotzooi  die daor dus in de grond schient te zitten... Nog zo'n fraaie kraantekop: POLITIE MAAKT ZICH ZORGEN OVER VEILIG­HEID OP STRAAT". Ja, dat is neijs heur. Het zul pas in de kraante mutten as ze zich gien zorreng meer maakten....

Ik maake mij ok zorreng. Want wat muj nou deenken van zo'n geval van polio in de Alblasserwaard ?  Ik bedoewle, aj een kiend een beste drei um de oren geeft dan bij al haoste straf­baar mar aj weigert oen kiend te bescharmen  tegen vrese­lijke ziejktes , wat dan ? Meensen met zokke principes zult ok wel gien valhelm en gien veiligheidsgordel dragen. Mar hoe onge­leu­felijk inkonsekwent sommmi­ge meensen bint zag ik dinsdaga­omd in Achter het Nieuws. Ik had op zien minst verwacht dat ze gekleed in vijgebladern veur de camera zullen verschijnen. Niks bleek minder waor. Totaal ingepakt in zwarte pakken enzo. Mar die kleren bint er toch ok veur um bijveurbeeld gien blaosontste­king enzo te kriejng ?  Ak dat ziej en heure dan vraog ik mij wel ies of, of het nou 1992 of 1692 is... Ik weet niet waorumme mar ak dan zo'n karkendag op televisie ziej en deenke an bijveurbeeld een EO laanddag dan kriejk opiejns visioenen van sproeivliegtuuggies ...

 Gelokkig was er ok nog wel wat vrolijker neijs. Grunningse deerns die veur een blootblad poseerden bijveurbeeld.  Dat mut in Drente toch ok kunnen liekt mij. Wij hebt tenslotte de meeste hunebedden!  En ik bin altied al een liefhebber van historie en de natuur ewest.­.. Kunt ze zokke wichters toch mooi fotograferen in historisch perspectief. Met de naodruk op perspectief natuurlijk... En die reclame van de ofgelopen weeken, DE NEDERLANDSE RADIO GAAT DE LUCHT IN. Daor mus ik wel um lachen want oongeveer op hetzelfde moment bint alle regio­nale zenders, ok Radio Drente, bombardeert (toepasselijk) tot rampenzenders..  Is dat nou toeval ?

Ik besluute mar ies weer met het mestoverschot. Ik bliejve der net as de boeren bij dat het um te gieren is. Mar misschien bin ik ok wel eh... stronteingwies....

12- GOEIEMORRENG DRENTE EN UMGEVING, HIER IS PIET SCHILLEBOER

Dat er verschil is tussen appels en peren, beste luusterDren­ten, is bekend. Ie kunt appels niet met peren vergelieken. Mar kunne wij ok het vollengde taalraodseltie oplussen ? : wat is het verschil tussen appels schellen ? Ik leg het niet uut.

Tussen appels schellen en peren schellen zit ok verschil. Dat ek maandagaomd eleerdt uut een documentaire van de NCRV op televisie. De documentaire gunk over Alie Wiering uut EEN, die naor Amster­dam verhuusd was umdat ze niet zo best teeng het plattelaand­sleven kun. En daorin heurde ik een pracht van een wijsheid waorin het leven op het plattelaand van EEN op een schitteren­de manie­re worde verwoord. Het was een mooie docu­mentaire vun ik al geleuv'ik niet dat de meensen in EEN repre­sentatief bint veur de gemid­delde plattelaandsbewoner. Mar in die uutzending dus, heurde ik iejn van de meest diepzinnige uutspraken die ik de leste jaoren heurt hebbe.

Alie preut met een tante aover tevredenheid enzo en zij vreug an heur tante of ze het niet vervelend vund, dat vrouwenwark, alle dagen mar weer hetzelde. Tante vund dat niet. Och zei ze, gistern ek appels escheld en eeregistern peren, dat is toch alle dagen weer wat aans...  Nee, nou muj niet begunnen te lachen want wees nou ies eerlijk, wat is er mooier in het leven dan zo tevreden te wezen met zokke kleine dingen.  Wat een wereld van verschil is dat met bijveurbeeld oons konink­lijk huus. Zijne koninklijke hoogheid Prins Bernhard, um der mar ies iejne te neumen, hoolt van meer SNELHEID. Hij hef een neije auto besteld. Viefhonderd­duujzend gulden kost dat geval (dat valt nog met want daor kuj hooguut een heel dorp in Somalie een jaor van laoten eten...) en de top­snelheid is iets van 350 km. per uure.  Zijne koninklijke SNELHEID kuwwe in 't vervolg beter zeggen as het giet um Prins BernHARD...  Mar verschil mut er wezen, niet allent tussen appels en peren. Weej wat het verschil is tussen leden van het koninklijk huus en gewone meensen die te hard riedt ? Bij leden van 't konink­lijk huus giet een pliet­siewagen met loei­ende sirene veuruut, bij gewone meensen giet ie der achter­an...

En nou ik het toch over HARD hebbe, dat was eem schrikken zaoterdagnacht. Knoerharde porno op de televisie in 't Hoog­eveine. Mien vrouwe kwaod want reken derop dat harde porno midden in de nacht een bulte lawaai gef. Ik gleuve trouwens dat ik de iejnige in de hele gemeente Hoogeveene was die het ok warkelijk eziejne hef. Ik zat te wachten dat het drei uure zul worden umdat de klokken dan trogge ezet mussen worden -dat mut ze in 't vervolg ok op een beetie een fesoenlijker tied­stip organiseren...- toen ik dus op die porno stuitte. 

Ie hebt ok altied gelok, zeiden sommigen en zo kuj't natuur­lijk ok bekieken.   Meensenkiender wat een gedoe en wat is het verschrikkelijk dat zoks zomar bij fesoenlijke meensen op de televisie komp. Gelokkig waren de beelden niet zo barre duud­elijk, ik heb wel een half uure mutten dreien um het een beetie te kunnen volleng. Het was verschrikkelijk. Ie snapt toch niet dat er meensen bint die dat wilt ziejn. Nao ander­half uure had ik het temeenste wel bekeken.   't Is mij trou­wens wel op evallen toen ak maandagnacht deur 't Hoogevei­ne reed dat er nog zoveule locht braandde.  Mar dat zal daor toch niks met te maken hebben ? Nee, zo bint ze in 't Hoog­eveine niet...

 Ik mus ok weer an die pornobeelden deen­ken toen ik van de weeke in de Drentse kraante las dat een Canade­se bos­worm niet zomar een piere is. Gek, mar ik heb soms van die vrumde asso­siaties.

Ik wil vrolijk besluuten. De Drentse Staten bint akkoord egaone met een fonds veur de Floriade die naor Drente mut komen aover tien jaor. Een kwart mil­joen wordt er nou veur appart elegd. En dat is gien geld vien ik. Een beetie auto kost teengwoordig al het dubbele en der kan hooguut een half dorp in Somalie een jaor van eten.

Oh en natuurlijk dierendag. Zundag is het dierendag en dat viere wij altied uutbundig. Ik heb al moewzevallen, rotte­kruud, een aantal vliejgenmeppers en molleklemmen an eschaft.

En wij eet ok altied lekker op dierendag. Karbonadegie, gebra­oden kiepie enzo. En de hond en de katten kriejgt natuurlijk de bot­ties... En mien vogel vergeet ik ok niet, die zet ik zundagnacht veur de televisie. Ik heb iejne veugel, een hele vrumde, een agaporno....

13- GOEIEMORRENG DRENTE EN UMGEVING, HIER IS PIET SCHILLEBOER

Wij hebt in Drente last van Hoge onkruiddruk, luusterdrenten. En dat is iejn van de redenen dat het CDA milieuvriendelijke landbouw niet zet zitten. Onkruiddruk.  Ak zoiets leeze, want het stund in de kraante, dan vraog ik mij altied of, waorumme die politici nou zok soort taal gebruukt. In mien tuune stikt het van het onkruud mar ik bin nog nooit in huus ekomen umme mien vrouwe te vertellen dat de onkruuddruk dit jaor weer ontzettend hooge is. Zo prat een boer niet. In de politiek is er vollengs mij heel vake sprake van HOOG GELULDRUK. Dat muj niet verkeerd verstaon. misschien zu'k beter kunnen spreken van hoge "UUT DE NEK-KLETS-DRUK".

Het valt mij wel vaaker op. Zo las ik van de weeke ok dat de N34 binnen tien jaar dreigt dicht te slibben. Ik meende dat de N34 een autoweg was mar aj zoks leest dan zuj deenken dat het de haven van Wachtum was.  En in de kraante stund ok: Vlag­twedde bezwijkt voor bezwaren tegen homo-camping. Ik zal niet zeggen dat dat niet kan mar ik zul hier ekeuzen hebben veur VLAGTWEDDE ZWICHT.  Op die maniere de kraanten deurpluujzen is mooi wark.  Gister hak er ok nog weer een paar: ONGEWENSTE RECLAMEFOLDERS STRAKS TABOE IN WESTERBORK. Dat is veur mien gevuul een beetie dubbel. Ongewenst is eigenlijk toch so-wie-so al taboe. En hoe het dan wel mut valt ook niet met. Veur aj't weet stiet er dan : WESTERBORK WIJST ONGEWENSTE RECLAME­FOLDERS DE DEUR". En dat kan natuurlijk helemaole niet... Op de televisie heur ik het ok vaake. Van die taal die net iets te veule van het goeie is. Let mar ies op aj weerman Erwin Krol heurt. Die hef het um te begunnen altied aover MOOOOOWGE en dan bedoelt ie MORRENG en af en toe zeg ie dan, as het weer der naor is, dat er een kaans is dat er een on­weersbuie valt. Daor probeere ik mij dan ok van alles bij veur te stellen. Mar het is mij tot nou toe nog niet gelokt um uut te vienden hoe dat precies giet.  Regen valt, wij kunt last hebben van buien en het kan onweren. Dat kan veur mien part ok allemaole tege­lieke mar een onweersbuie die valt ?  Sporters doet het ok.  Ja, vallen ok wel ies, mar krom praoten of met moeilijke woorden verkeerde dingen zeggen  doet ze ok. En zij neemt het ok heel snel van mekaar aover. Van de weeke heurde ik nog een voetballer zeggen dat het veural gung um EEN GOEIE WEDSTRIED NEERZETTEN. Sporters mut vollengs mij ok veural sporten en der niet teveule aover praoten. Af en toe deenk ik, zij hadden net zo goed een kroppe slaot kunnen interviewen. De veurmalige wielrenner Gerry Kneteman meuk het ooit as commenta­tor zo bont dat zulfs mien zeuntie van zesse der um mus la­chen. Ik kunde in de gauwigheid noteren: DAN STEL JE JE EIGEN WEL EENS VRAAG­TEKENS  en "HIER ZIJN AL HEEL WAT CARIERRES NEERGEBROKEN"...

  Iets heel aans. De Martinitoren hef overlast van plassers en um dat te bestrieden gaot ze verlichting installeren. Zodra iemand last van hoge druk kreg en verlichting zuch onder de toren kreg ok verlichting as ie daor giet staon... Een veule simpeler oplossing is schrikdraod en een camera. Misschien een idee veur een programma op de lokale Grunningse televisie ?

 May Weggen reeste vleeden weeke deur Grunning met een snel­heid waor autocoureur Jan Lammers jaloers op kan wezen. En dan leez'ie een paar dagen later dat ze niet wordt vervolgd umdat ze het zo drok had enzo.  Dat zal wel. Dat heb ik ok altied ak te hard riede. Dan hek het drok. Mar mij hulpt zo'n smoes niks. Daor muj dus hare excelentie veur wezen. Hare exclemen­tie zeg mar.

  Eindelijk is het dan zover. En daor besluut ik met. Harry Muskee hef de culturele pries van Drente ekregen. Hij had hem twintig jaor geleden al mutten hebben aj't mij vraogt want rekent erop dat mien zulfbewustzijn as popmuzikant  in de jaoren 60 en 70 flink op evijzeld is dankzij Harrie. En dan die emancipatoire kracht he ? Hij mus er zullef ok wel een beetie umme lachen geleuv'ik, een soort DISTANT SMILE.  Beter laat dan nooit heurd'ik hem zeggen en zo is't natuurlijk ok.  Het duo Karst mut ok nog mar niet wanhopen. As ze gewoon vol bliejft hoolden dan mut het lukken zo rond 2010...

Mar hoe dan ok, Harrie hef 't eredt. Van Cuby naor CUBO zak mar zeggen. En CUBO stiet dan veur Cultuurbons.  Drente kende al de legende van Ellert en Brammert, de reuzen uut Schoon­oord.  Nou is dan eindelijk ok de levende legende uut Assen officieel tot REUS beneumd.  En dat is REUSACHTIG goed neijs!!

14- GOEIEMORRENG DRENTE EN UMGEVING, HIER IS PIET SCHILLEBOER

Behalve kraanten naopluujzen op rare berichties en rare kop­pen, beste luusterdrenten, heb ik nog een grote hobby. Radio en Televisie luusteren bijveurbeeld. Luustern ja.  Ok naor de televisie kuj luusteren. Der bint zat programma's die het kieken niet weerd bint en dan luuster ik. En wat mij dan op een gegeven moment heel snel opvalt, dat bint stopwoorden en raar microfoongebruuk. Ik kieke dus ook nooit naar Hans Kazan um der mar ies iejne te neumen. Mar Aj die man op een gegee­ven moment in de microfoon heurt zwetsen dan gaot bij mij spontaan de stoppen deur. As er nog ies een pries uut ereikt mut worden veur de slechtste microfoontechniek van Nederland dan mut die Kazan hem op een gegeven moment mar kriejng. Hij drokt dat ding zo oongeveer achter de tonge en het gevolg is dat het geluud dat aj vervolgens heurt stikt van de blobs en de plof­fen. In combinatie met zien zeer beperkte woordenschat is dit programma veur mij ernstig stressbevorderend. Mar gelokkig kiek er nooit naor.

Geweldig mooi wark is op een gegeven moment het stopwoorden luusteren. En daor bint er nogal wat van. Ik hoeve der eigen­lijk helema­ole niet op te letten, zij valt mij inderdaod gewoon onmiddelijk op. Veurige weeke heurde ik op een gegeven moment iemand van de Tamboer in 't Hoogeveene op de radio. Een eeeh hele eeeeh aordige man. eeeh die eeeh iets eeeeh vertul eeeeh aover eeeeh het eeeeh neije eeeeeh theater eeeeh seizoen eeeeeh.... Daor woor'ik vreselijk eeeeh. zenuwachtig van. Ik magge hopen dat op een gegeven moment in het program­ma van de Tamboer wat meer snel­heid zit, zak mar zeggen.

Ok heel veule gebruukte stopwoorden op radio en televisie bint de woorden DUS en INDERDAAD.  Die wordt dus allebeide op een gegeven moment inderdaod te pas en dus te onpas gebruukt. Wie op een gegeven moment sportverslaggever Heinze Bakker wel ies heurt mut inderdaad mar ies opletten hoe vaake die dus inder­daad inderdaad zeg... Veural dus op plaatsen dus waor het dus inderdaad totaal overbodig is dus.

Heel populair bint ok woorden as 'JA-JA'  en PRECIES! En der bint er dus inderdaad nog wel wel veule meer heur. Ik heb al ies met plannen rond elopen um op een gegeven moment een STOPWOORDENBOEWKIE te schrieven.

Het verve­lende van stopwoorden is op een gegeven moment, dat zo gauw aj ze heurt dan liekt het inderdaad dus net of ze op een gegeven moment zichzulf verstarkt. Ie hoeft er dan dus helema­ole niet meer op te letten dus want ie heurt ze, aj nou wilt of niet.

Nou kan'k mij veurstellen dat as ie as luusteraar op een gegeven moment inderdaad dus deenkt van: Zul die Schilleboer zullef ok stopwoorden gebruuken ?  In principe niet.

Ik geleuve dat ik het op een gegeven moment dus ok wel doe mar in principe probeer ik ze dus op een gegeven moment uut mien teksten te schrappen. Mar helemaole ontkooj der op een gegeven moment niet an.  En ik luustere op een gegeven moment mien praoties ok altied trogge zoda'k dus inderdaod mijzullef op een gegeven moment ok kan controleren.

Maar ik mut toegeven dat ik inderdaod op een gegeven moment mij der dus ok wel ies schuldig an maake. Mar niet altied heur.

Soms, zak mar zeggen. Of eeeh... inderdaod, op eeeeh gegeven momenten, ZEG MAR, DUS...

15- GOEIEMORRENG DRENTE EN UMGEVING, HIER IS PIET SCHILLEBOER

Bin ie ok allemaole zo raozend beneijd wie het zal worden Luusterdrenten ? De neije president van Amerika bedoel ik. Spannend heur. Ik heb die debatten op televisie evollegd. 't Deud mij een bee­tie deenken an vroggere televi­siespellegies WIE VAN DE DRIE en BABBELONIE...

Mar toch,  ak het ziej dan deenk ik: zoks misse wij in Dren­te. Want ok veur oons Drenten bint het spannende tie­den. Der zal neije kommissaris van de Koninginne komen mar het is zo stille daor ummetoe. Der wordt nauwelijks aover epraot. Het leeft totaal niet zo liekt het wel. Wat zul het toch fantastisch mooi wezen as daor zo'n spek­takel van emeuken worde as in amerika.  Met grote bijeenkomsten en verkiezingstournees deur de provincie enzo. En ok drei kandidaten natuur­lijk. Ik ziej dat helemaole veur mij aover een paar jaor. Want nou is't al te laate. Ik stelle mij der zulfs wel kandidaten bij veur. Marga Kool, Sietse Faber en Henk Wijngaard... En recht­streeks deur TV-Drente uutgezunden debatten uiteraard.  En dan vrao­gen stel­len aover die vuil­verbrander bij de VAM bijveurbeeld.  Marga, die dan zeg: eh... "Achter mien ogen, vien ik eigen­lijk dat het niet had gemogen. Mar toen ie der kwam, dacht ik 't Is goed veur de Vam..."

Sietse Faber zal het er wat moeilijker met kriejng, vrees ik  Die raakt in Wijster, vermoed ik, het spoor  bijster...

En van Henk Wijngaard kunne wij nauwelijks aans verwachten dan dat ie zal zeggen, of zingen: "Met de vlam in de pijp...."

 Mar dit is allemaole fantasie. Of wij veur Sunterklaos nog een neije commissaris kriejgt weet ik niet. Ik heb wel de name Marjanne Sint heurd. Die was ooit veurzit­ster van de Partij van de Arbeid en barre gek op fietsen. Allent daorumme zit ze hier al gebeiteld want het stikt hier van de fietsepaden. En ik durve ok wel te veurspellen dat er binnenkort in aller­lei kraanten weer berichten verschijnt waorin stiet: SINT KOMT NAAR DRENTE... WEDDEN ?

 De gemeente Hoogeveene hef het moeilijk luusteraars. Zij wilt de gokkasten anpakken mar op wat veur maniere daor bint ze nog aover in discussie. Ervaring hebt ze wel op't gemeentehuus van 't Hoogeveene. Daor gokt ze zullef namelijk ok regelmatig en dat hef de ofgelopen jaoren al een beste bom duiten ekost. Veur een toeristische attrac­tie, bijveurbeeld,  die ze HET FENOMEEN eneumd hadden en die een paar honderd­duujzend toeris­ten per jaor naor 't Hoogeveene zul trekken. Dat was dus een fatale gok want toen ze derachter kwamen dat dat veul te hoge egrepen was hadden ze der al enige honderdduijzenden guldens an vergokt. De horeca in't Hoogevee­ne mut daorumme mar goed luustern naor Be en Wee van Hoogeveen want die hebt een schat an ervarings in het gokken....

En dan koonk er ok haoste niet onderuut um het nog even te hebben aover die slager in Hollandscheveld. Die prat al niet meer aover B EN W mar aover ACH  en WEE as het aover de ge­meente Hoogeveene giet.

De slager worde arresteerd toen ie een paar bomen ummezaagde van de gemeente. De slager meuk bij zien arrestatie het vee-teken heurde ik. Het Rundvee-teken want hij is slager in hart en nieren...

Ik heb aover disse situatie een liedtekste eschreven. Speciaal veur disse column hek der een riem van emaakt en daor wok van de weeke met besluut­en:

DE SLAGER VAN DE HOEK IS IEDEREEN DE BAAS

MET SPEK EN KARBONADE EN BIEFSTUK VAN DE HAAS

DE SLAGER VAN DE HOEK IS VLESELIJK TEVREE

EN ELKE WOENSDAG ZINGT IE

EN Z'N PERSONEEL ZINGT MEE:

   IK HEB GEHAKT, GEHAKT, GEHAKT, IK LEVER WORST

   IK HEB GEHAKT, GEHAKT GEHAKT EN KALFSBORST

   IK HEB GEHAKT, GEHAKT, GEHAKT

   ALS U MIJ OP DE MAN AF VRAAGT

   DAN KLINKT HET MISSCHIEN AFGEZAAGD

   MAAR IK HEB GEHAKT, GEHAKT, GEHAKT

DE SLAGER VAN DE HOEK HIELD NIET VAN BOMEN

ZE STONDEN IN DE WEG EN HIJ HEEFT ACTIE ONDERNOMEN

DE SLAGER VAN DE HOEK WAS DAARNA WEER TEVREE

HIJ ZEI, HET ZAL ME WORST ZIJN, IK WIST HEEL GOED WAT IK DEE

  IK HEB GEHAKT ENZ.

DE SLAGER VAN DE HOEK WERD IN DE KRAAG GEPAKT

EN MISSCHIEN KOMT IE STRAKS WEL VOOR DE RECHTER

EN ALS DIE HEM DAN VRAAGT WAAROM IE HEEFT GEZAAGD

DAN IS DE SLAGER LINKER

EN ZEGT KOEL EN ZEER GEWAAGD:

   IK HEB GEHAKT ENZ.

16- GOEIEMORRENG DRENTE EN UMGEVING, HIER IS PIET SCHILLEBOER

Ik heb mij van de weeke of evraogd, geachte luusterdrenten, of Drente in het jaor 2126 nog wel zal bestaon. En dat hef mar ziedelings te maken met die komeet die op 14 augustus van dat jaor de hele wereld in iejne grote klap zal vernietigen. Daor hebt zo zachies an alle columnisten al een flitsend stukkie aover eschreven. As Drente dan niet meer bestiet kan het ok niet verdwijnen. Ik heurde namelijk dat de politiek weer bezig is um de provincies op te heffen. Der mut zo'n 20 neije regi­o's komen in plaats van de bestaonde provincies. Politici zorgt altied goed veur zichzeulf, deenk ik dan. Want tel mar nao, dan mut er weer een stuk of acht neije kommissarissen van de koninginne komen OK. Mischien dat ze dat bedoelt as ze praot aover neije warkgelegenheid scheppen...

Het hef toch ok wel goeie kaanten. Nou wordt er binnen D66 bijveurbeeld over epraot dat Marga Kool de amateurstatus mut

kriej­ng. Met een beetie gelok kreg ze dan de kaans um helemao­le beroeps te worden. Ie weet mar nooit.

En hoe zal het dan gaon met oonze taal, vraog ik mij ok of. Wij bint net zo bliede dat oons Drents eindelijk serieus eneumen wordt. As Drente op eheven wordt hoe mudde wij de taal dan neumen ? Niet Algemeen Onbeschaafd Nederlaands ofzo ? Mar dat bestiet ok al geleuv ik...Laowe veurlopig mar gewoon ofwachten  hoe het allemaole oflup. Iejn ding is zeker, as er iejne Drentse familie is die nog heel lange Drent blef, dan is het wel de familie Kleine uut Diever. Die hebt veurige weeke de klokke al honderd jaor trogge edreit. Ik verdeenke die Kleine van profetische gaven...

Een paar ernstige berichten uut 't Hoogeveene. Vier zwaore jongens ontsnapt uut de Grittenborg. Die namen die VVV leuze van "Breek er eens uit in Hoogeveen" weer net iets te letter­lijk. En dat concert van Lee Towers dat niet deurgung. Der wordt in Hoogeveene efluusterd dat het wat met mekaar te maken hef. Ik zul ok ontsnappen ak wus dat Lee Towers zul komen wik mar zeng. En de Mauritshal is ok gien Ahoy, dat magge wij ok nooit vergeten...

Iejn van de mooiste berichten van de ofgelopen weeke vun ik dat aover die plannen van het instituut veur creatieve ontwik­keling in Assen. Die gaot een cursus organiseren veur oolders die graag wilt zingen veur de baby. "Muziek op schoot" heet het project. Dat snap ik ok niet hele­maole heur want zij kunt wel zin­gen die oolders. Dat hebt ze bewezen want nou ze die baby's hebt magge wij toch annemen dat ze niet veur het zin­gen de karke uut egaone bint...

Maar goed, veule oolders kent de teksten en de melodie van de oolde kinderliedties niet meer. En daor gaot ze in Assen nou wat an doewn. Waorumme dat nou perse oolde kienderliedties mut wezen begriep ik eigenlijk niet. Of is het dan toch zo dat wij in heel Drente kontinu krampachtig bezig bint de klokke 100 jaor terogge te dreien net as Smid Kleine in Diever ?

Mien kiender zweert bij Kinderen voor Kinderen en as ik eer­lijk binne dan vien ik die liedties ok veule mooier dan die oubollige "Slaap-kindje-slaap" toestaanden.

En daorumme besluut ik met een modern kinderliedtie. Hartstik­ke mooi en ik drooome der wel ies van ak weer berichten elezen of heurt hebbe van de Drentse dreuteligheid:

OP EEN ONBEWOOND EILAND

LOOPT NIEMAND VOOR JE NEUS

JA JE VOELT JE DER BLIJ WANT

LEKKER LEVEN IS DE LEUS

  En dan speciaal veur de \hoogeveeners die de komst van Lee Towers vreesden:

OP EEN ONBEWOOND EILAND

ZIJN ALLE DAGEN FIJN

OP EEN ONBEWOOND EILAND

DAAR ZOU IK WILLEN ZIJN....

17- GOEIEMORRENG DRENTE EN UMGEVING, HIER IS PIET SCHILLEBOER

Amerika hef een neije president , zeer geachte luusterdrenten en hij heet Willem. Want Bill dat is in oonze taal gewoon Willem.  De neije Amerikaanse president heet dus een klein beetie net zoas oonze kroonprins. Want die heet ok Willem en as die in Amerika zul wonen zul hij dus Bill heten. 't Is mar goed dat oonze Willem nog gien koning is want het zul een regelrechte dijen­kletser wezen as ie dan op staatsbezuujk naor Amerika mus.  Dan zullen wij in de kraanten lezen: Billen bezoeken elkaar.

Zul die neije Amerikaanse president trouwens een rechtse of een linkse Bil wezen ? Want dat is mij nooit helemaole duud­elijk. Schut mij opiejns te binnen dat wij hier nog een Willem hebt. Willem Kok. Degenen onder de luuste­raars die een beetie Engels kunt verstaon zult het met mij iejns wezen dat Bill Kok helemaole niet kan in AMERIKA... Mar goed, kroon­prins Bill is nog lange gien ko­ning. Zien moeder hef er net 12,5 jaor opzit­ten en is nog niet echt van plan um op te stappen. Hoeft veur mij ok niet heur. 't Is een best meen­se, oonze koningin­ne. Dat heur ik temeensten aoveral. Zij hef vorm egeven an het moderne koningschap zeg iederiejne en dat zal dus ok wel zo wezen. Al heur zeunties en neven geeft aover het algemeen ok aordig vorm an het moderne prin­senschap. Nou is veurige weeke Maurits, die is meen ik van Pieter en Margriet, bij Zuudwolde van de snel­weg of evleugen. Hij kreeg last van aquaplaning zeiden ze en dan giet oen auto vliejng. Maurits was op weg van Grunning naor Apel­doorn.  Der zat niet aans veur hem op dan te bellen. Het bint snelle jonges, die jongens van oranje... Ik hoope veur Rijkswaterstaat dat de bordties langs de snelweg een beetie heel ebleven bint.  Rijkswaterstaat is namelijk nogal verdrietig. Zij zet allerlei neije verkeersborden langs de snelwegen en nou bliekt dat roofgoed te wezen. Letterlijk en figuurlijk. De bordties bint heel snel weg. Nee, dat zeg ik verkeerd, zij staot naost de snel weg en zij bint snelweg. As ik Rijkswaterstaat was zuk er handel van maken. Want het bint hartstikke mooie dingen um te gebruuken bij verjaordagen enzo.  Die vrouwe In Emmercompas­cuum zal zich toch niet vergist hebben. Die verzamelt BARTJES en dat scheelt mar weer iejn lettertie met BORDJES. Nou ja, twei mar de D en de T klinkt hetzelde dus! Mar waorumme zuj wel Bartjes en gien bord­jes verzame­len ? Mien kiender hebt zulfs een heele kollek­tie BERTJES, ie weet wel van ERNIE.

Der schient nou toch wat geruchten de ronde te doewn aover de neije kommissaris van de Koninginne. In de wandelgangen wordt de naame van mevr. Margreet de Boer eneumd. En ik heb ok uut goed ingelichte kringen heurt dat de naame van proffesor dokter ingenieur Akkermans eneumd wordt. Ik heb daor eem naor informeerd en jawel. " JAZEKER, IK WORDT GENOEMD, zei hij. EN IK WEET OOK ZEKER, MENEER SCHILLEBOER DAT IK OOK NIEUWE INHOUD ZAL GEVEN AAN HET MODERNE COMMISSARIS DER KONINGSCHAP"...

Ik bin zeer beneijd hoe dat zal oflopen. Zo'n Akkermans liekt mij wel wat veur Drente!

 En wat ik ok zo mooi viene, der is een neij genootschap in oprichting in Drente. Een genootschap veur Drentse riempies.

Light Verses neumt ze dat (dat is ok echt Drents) en dat betekent dat het riempies met een dubbele bodem bint. Dat aj der um mut kunnen lachen. Spotriempies enzo. Ik maake ok nog wel ies van zok soort dinggies en nou bink beneijd of ik ok lid kan worden van dat genootschap. Daorumme zak nou eem een paar van die varsies reciteren.

BETON heet de eerste:

ZOAS DIE OOLDE KEREL DAOR STOND

DE RUGGE KROM EN ROND

MAAR TOCH DIE LACH

WANT, ZEE HIJ, ACH,

DAT KOMP DEUR MIEN BUTTON....

  Nog iejntie, die heet AGENT.

'K WAS DE WEG KWIET IN 'T BELGISCHE GENT

VREUG UM HULP BIJ DE GENDARMERIE

MAR DE DIENDER ZEI , NEE, NEE, IK WEET NIE

U MOET WETEN , IK BEN EUH.. A----GENT...

 Ik heb er ok nog iejne over taal:

EEN FRIES KENN'IE DREKT AN ZIEN TAAL NOW ?

EN EEN GRUNNINGER AN ZIEN GEKNAUW

IK WOR OK HERKEND

AS EEN RASECHTE DRENT

DAT HERKENNEN NEUMT ZE IN ENGELAAND KNOW HOW....

  Oh ja, nog eem over dat genootschap. Die naame,  die klinkt metiejne weer zo oolderwets. Een tip waor de oprichters mis­schien met uut de voeten kunt .  Maakt er het Drents GENIET­SCHAP van . Want daor giet het toch umme. Dat wij der van geniet ? Daor hek er ok nog eene op emeuken  en daor besluut ik met:

GEDICHTEN BINT GESCHREVEN GEDACHTEN

SOMS MUK ER BARRE UM LACHEN

MAR HET KAN OK AANDERS WEERN

DAN BINT ZE UM TE REERN....

18- GOEIEMORRENG DRENTE EN UMGEVING, HIER IS PIET SCHILLEBOER

In Meppel, beste luusterdrenten, hebt ze gesodemieter over een openbaar toilet. Wat er precies an de haand is muj mij niet vraogen, want dat weet ik ok niet, mar populair gezegd zuj kunnen zeng dat er stront an de knikker is.  Daor begriep ik niks van. Zokke opnbare toiletten bint toch in oons aller belang en dan gaoj der toch niet over  lopen te zijk...eh, zeuren bedoel ik. Mar zij mut het ok zulf mar weten of ies kontakt opnemen met de plaat­selijke karken. Want achter de karke pissen mag ok niet zo is mij al heel jong eleerd. Dan kunt ze der misschien in plaats van een openbaar, een eucome­nisch toilet van maken. Kan iemand mij trouwens ies vertellen waor die uutdrukking, dat aj niet achter de karke magt pissen, vandaon komp ? 

Ak de kraante mut geleuven dan hebt de koewn straks nog eerder een openbaar toilet dan de meensen in Mep­pel. Want koewn schient best zo te dresseren te wezen dat ze het netties op een soort toilet doet. Dat is weten­schappe­lijk onderzucht en dan is het ok zo. De boeren waren daor all lange achter want in elke boerderije doet de koewn het keurig in de gruppe. De boer is de wetenschap dus eigelijk al weer een slag veur ewest. Waor of niet ?  Iets leuks: de Drentse VVV komp met een folder. Een promotiefolder onder de titel DRENTHE MET DE H VAN HEERLIJK. Nou zal het wel weer an mij liggen mar wat mut de buutenlaander nou toch met zo'n kreet. Drente met de ha van heerlijk.. Is dat nou een bewuste link naor het deur veulen zo verguisde Drentse volkslied (het heerlijk landje ?). Of giet het erumme dat de meensen mut weten dat aj Drente schriejft met een H derin.  Ie spreekt hem niet uut, aans zullen ie zeggen DrentHU. Nee, het dut mij deenken an een flauw grappie: Ik heete Piet met de J van Willem... Ak goed in elicht binnen dan hebt ze hier zowat twei jaor aover nao edacht. Tsja... Dan heb ik toch een beetie het gevuul van Drente met de dr. van eh... 

In't Hoogeveene bint ze ok weer mooi bezig ewest. De stich­ting Hoogeveense vrouwenraod hef een adressenboekie veur vrouwen emaakt. Dat ruk naor discriminatie vien ik, want wij mannen kunt er naor fluiten. Ja, ok naor de vrouwen, mar zker ok naor zo'n adressenboewkie. Allent de gemeenteveurlichter Anne de Jonge die zit gebeiteld.  Want die kreeg het eerste exemplaar an ebeuden. Die de Jonge hef daor­met metiejne aller­lei vrou­wenadressen te pakken mar onbewust hef de vrouwenraod  daor toch ok heur eing tekortkoming een beetie weg ewarkt. Ik bedoewle, zo'n boewkie anbieden an DE JONGE. En de man zien veurname ANNE wordt ok deur vrouwen gebruukt... Weej wat eigelijk ok barre raar is ? Dat sommige berichten de kraante haalt terwijl ze feitelijk niks biezun­ders meldt. In Assen bijveurbeeld. Daar hebt ze een leeg koffertie evunden bij een baank.  Dat is neijs. Ja okee, zij dachten dat er een bom inzat, mar het was dus leeg. Em umdat het leeg was en er dus gien bom inzat stund het in de krante.  Snappie wat ak bedoew­le ? Dat is oongeveer hetzelde of aj in de kraante zull'n zetten dat Piet Schilleboer gien pries ewunnen hef in de staatsloterije. Het had best ekund, mar het was weer ies niet zo.  Hetzelde gevuul kreeg ik ok weer een beetie bij : Perso­neel Grittenborgh verijdelt ontsnapping. Daor bint ze toch veur an eneumen ?  Het zul pas neijs wezen as het perso­neel ontsnap­pings bevorderde. Nou, dat doet ze dus niet maar dawwe nou kunt zeggen dat die Grittenborgh een echte Borgt is, is ok niet zo.  Die Grittenborgtoestaanden biedt  trouwens wel perspec­tief veur de toekomstige Drentse televi­sie. Der bint vaste al wel scenario­schriejvers bezig met een saop-serie aover de spectaculaire ontsnappings. Ik bedoewle mar, zo gek kan het niet gaon of der ontstiet wel weer iets positiefs uut. Zo stel ik mij bijveurbeeld ok veur dat in Assen, as de TT niet deur­giet een fantastische wielerronde op de TT baane organiseert wordt. Ik neume mar wat, mar in Dren­te, met de H van fietsen, mut dat toch kunnen ?

In Gieten tenslotte, is iemand op het fameuze idee ekomen um peerdebelasting in te voeren. Hij hef geliek. Waorumme wel hondebelasting en gien peerdebelasting ? Der bint inderdaod nog heel wat dingen die niet belast bint en dat mag zo zachies an wel ies veranderen. Kattebelasting, kanarie- en parkieten­belasting, joggingpakkenbelasting, fietsepaden- en trottoirbe­lasting, aoverbelasting... en wat te deenken van toiletpapier­belasting ? Dan wordt die lui die aoveral scheit an hebt ok ies een keer an epakt....

19- GOEIEMORRENG DRENTHE EN UMGEVING, HIER IS PIET SCHILLEBOER

Der is de ofgelopen weeke weer een neij woord op edeuken in oonze vaderlandse woordenschat, beste luusterdrenten. De BESPARINGSSNIP". 't is een idee van minister Andriessen. Huushooldens die zuujnig met energie ummespringt kriejgt meugelijk vanof vollengd jaor honderd gulden beloning. Het liekt een sympatiek plan. Gewoon de gaskachel of de cen­trale verwarming wat leger en an het ende van 't jaor die snippe binnen­halen. Mar zul de minis­ter wel weten wat een beetie TRUI kost?  Want die bij dan minstens neudig. Daormet hef ie het veur­deeltie metiejne weer op. En gister sprak ik een gooche­merd die van plan was um dan veur die 100 gulden een elek­trisch kacheltie an te schaffen ... Dat schut dus lekker op...

Ge­woon energiebelasting invoeren liekt mij een stok simpeler. Daor zal 't straks ok wel op uutdreien deenk ik. Honderd gulden betalen aj boven het gemiddelde koomt. Aj der dus onder bliejft dan hej ze verdiend! Zo warkt het toch in de reclame ok ? Was er al niet een slogan in de trant van: Nou Een paar grao­den minder dan zitte wij der straks alle­maole warmpies bij ... Zo niet, dan bij dezen.

Nou, wij bint er zo zachies an wel achter hoe aj binnen een paar jaor van eenvoudig provincieplaatsie wereldberoemd kunt worden in heel Nederlaand: Het fenomeen van Hoogeveen: Zorgt dat aj een gevangenis binnen de gemeentegrens kriejgt! Heel Nederlaand wet onderhaand dat 't Hoogeveene  bij die gevange­nis lig. Veur Drentse gemeenten met enige ambitie geldt dus: Je zit snor met een nor!

Drente stiet op de drempel van een neij tiedperk, geachte luusterdrenten. De boeren in 't algemeen ruurden zich hier altied al aordig.  Straks zal DE BOER er alles an gaon doewn drente op te stuwen in de vaart der volkeren. Gien geMEIJER ­meer vanof 1 januari 1993. Nou gaowe der pas echt teengan met oonze neije commissaris van de Koninginne!

 Wim Meijer worde joh ok helemaole niet serieus eneumen. Gao mar ies nao. Hij vormt een kommissie die mut onderzuujken of de diens­tplicht mut bliejm bestaon of niet,  ze koomt tot de konklusie dat het veurlopig mar ongeveer mut bliejm zo as't is. De minister leg dat rapport nou naost zich neer en giet hoogst­waarschijnlijk precies het teengovergestelde doewn. De dienstplicht ofschaffen dus.

Dan kriej toch een beetie het gevuul dat er een loopie eneumen wordt met Meijer. En dat is dan ok weer niet iejns zo barre vrumd.  Want oons huidige leger hoeve wij ok niet echt serieus te nemen, zo tipte een luusteraar mij ofge­lopen week­end. Der zul weer een ploeg militairen naor Joegoslavie mar die muggen niet weg umdat de Engelsen, die heur zullen bewa­ken, der nog niet waren. Zo'n leger kuwwe vollengs mij ok het beste mar ofschaffen. Aj daor de oorlog met mut winnen... En nou bint er ok weer plannen um de luchtmobiele brigade in Drente te staio­neren. De frisse Drentse lucht kuwwe onderhaand ok wel verge­ten: Drenthe met de H van HAFVALVERBRANDINGSOVEN EN EFSCHROEF­VLIEG­TUUJNG...

Mar Drente is bliede met mevrouw de Boer as neije kommissaris van de Koninginne. Meijer weg naor de boerenleenbaank (daor wordt ie Besparingssnip, zegt ze) en wij de Boer weer trogge. Gien gekke ruil donkt mij al waren der natuurlijk drekt ok weer opmarkings over het feit dat mevr. de Boer gien zwaorge­wicht zul wezen. Dat vien ik zo onneuzel.   As ze echt een zwaorge­wicht hadden willen hebben dan hadden ze Ien Dales of Erica Terpstra hierin mutten halen. Niks verkeerds aover die beiden, 't bint heele liejve meensen, mar wij hebt zo ok al  last van  aardbevings, en zo'n mooie slanke dame as Mar­greet de Boer is toch barre mooi ?  Laowe heur mar met gejuich binnen halen. En dat dut mij opiejns weer deenken an de profe­tische blik van sommige Dren­ten. Mien veurganger-columnist hef het namelijk lang geleden al veurspeld.  Was het niet Ab Drijver die zung: 'T IS DE BOER, 'T IS DE BOER ? Het wordt tied dat ze dat plaatie weer ies dreijt!

Is oe trouwens wel op evullen dat mevr.de  Boer wel een beetie op Marga Kool liekt wat uuterlijk betreft ?  Mar­greet is een paar jaor oolder as Marga, mar toch, zij hebt wel wat van mekaar, Margareta en Marga. Um hoe eerlijk de waorheid te zeggen meensen, durf ik het wel hardop te zeng: het bint snuujpies, Margareta en Marga... Snuujpies bint het : euh...M en M zeg mar...

20- GOEIEMORRENG DRENTE EN UMGEVING, HIER IS PIET SCHILLEBOER.

Nou luusterdrenten, wij magt niet klagen over de publiciteit die Drenthe de ofgelopen weeken op televi­sie had hef. Veurige weeke zag ik in het programma van Gewest tot gewest een uutge­breide reportage aover een struusvogelfok­kerije in Zuudwolde, in datzelde programma kunnen wij ankomen­de dinsdagaomd oonze eing Harrie Muskee verwachten, der was veurige weeke een reportage in Opspo­ring Verzocht rond een over­val op het Hoog­eveense postkan­toor, Nationale zwumwed­strieden zag ik via Studiosport vanuut het Hoogeveense zwum­bad en maan­dagaomd was Margreet Dolman hoogst­persoonlijk in Daolen um daor twei frisse jongens op te nemen die an mekaars tenen zaten te zoewng. En dan kwamen daor verempel dinsdag­aomd Willem en Brenda uut Sleen nog eem bij LINGO de VARA een dikke 7000 gulden armer ma­ken...En natuurlijk de continjoeing story of the Gritten­borg. Dat is niet bepaald posi­tieve propagan­da veur Drente mar ik heb wel ies heuren roewpen: het gef niet HOE as ze aover oe praot, AS ze mar aover oe pra­ot.... Ik kan trou­wens melden dat het drama de Grittenborgh nog niet veurbij is. De directeur is nou zullef met een ontsnap­pingspoging bezig. Um an zien schorsing te ontkomen zeg mar.... En dan natuur­lijk nog het neijs van die oolde kerel uut Canada die vieftig jaor nao zien wandaden waar­schijn­lijk opnei op epakt zal worden um alsnog zien straf te ondergaon.  Ik gao daor gien oordeel aover uutspreken.Ik vraoge mij wel of, wat beter is: foute bejaorden achternao zitten of de jeugd opvoeden... Beide misschien ? Teglieke deenk ik, maakt er zoveel meuge­lijk publi­ci­teit van, zodat de ellendige idio­ten, die neo-nazi's van disse tied, der achter koomt dat ze met heur af­grijselijke gedach­ten, woorden en daden aover viftig jaor nog vervolgd kunt wor­den!!! He toch. Dat mus ik gewoon eempies kwiet. Mar ik begunde aover publiciteit van Drente via de televisie. En waor Drente nauwe­lijks bij an de bak kwam, dat was die spel­lings­wedstried veur scholieren. Ik heb niet alles eziejne, mar genog um weer  te kunnen konstate­ren dat oons Drents toch een machtig mooie taal is. Een taal waor ak bliede met binne. HET IS VOOR MIJ NIET ZO'N PROBLEEM OM REDELIJK ACCENTLOOS NEDER­LANDS TE SPREKEN. EN ZOU HET ZO WEEZ'N DAT U ZEI, NOU IK KAN TOCH WEL HOOR'N DA'J UIT DRENTE KOMT, DAN VIND IK DAT OOK NIET MEER ERG. Want de accenten in die spellings­wedstried waren ok niet van de locht.  Op 't leste mussen die jongen woorden spellen en daor was er iejne bij die dat als volgt deut: PRIORITEIT: PEI-EW-IE, OUW- EW-IE-TEI-EI-IE-TEI. Het leek meer op een recept veur iets met EIER, DAN OP HET WOORD PRIORITEIT. Wij Drenten hadden dat oongeveer as volgt edaone: PEE-ERR-IE-OO-ERR-IE-TEE-EE-IE-TEE. En dat klinkt toch veule beter ? Ik bedoewle EEEE is toch veule meer EE dan EIJ en RRR toch veule meer ER dan EWW ?  En nou ak mij daor toch aover an't opwien­den binne hek nog zo­iets. Sylvia Millecam. Televisiester te Hilversum en omstre­ken. Die hef een plaate emaakt. En dus heure ik nou vief keer op een dag het liedtie BRAAND op de vaderlandse radio. Leuk lied, niks ver­keerds an. Mooie bedacht enzo mar hoe is het toch in vre­des­naame meugelijk dat Twentse en Drentse artiesten (Herman Finkers  en Karrespoor uutgezun­derd) bij de natio­nale radio vrijwel nooit edreid wordt en dit naomaak-dialect van die  Millekop wel ? Er wordt altied ezegd, wat een boer niet kent enz. Ik zul willen zeg­gen, wat die Hilversumse radio en televisieboeren niet kent dat dreit ze niet! 

Tenslotte nog dit. In Emmen is een BABY-NIJLPAARDJE geboren. Dat mut een heel vrumd gedrocht wezen. Veural umdat het woord BABY in dit verbaand echt narrengs op slat.  Ik heb temeenste nog nooit iemand heuren praoten aover een PAARDEBABY. Mien vrumde woordenboewk vertelt mij dat het woord BABY van toepas­sing is op kleine kiender die nog niet kunt praoten (en spel­len dus al helemaole niet). Het  woord is afkomstig van het Engelse "to babble".  BABY NIJLPAARD­JE kan wel mar dan in dezelfde vorm as BABYKLEERTJES. As iets veur babys dus!!  Bij de vollengde gezins­uut­brei­ding van de nijl­paardfa­milie wil ik dit soort taalver­woes­ting niet meer meer lezen: Jong Nijlpaard geboren zuk anraoden hoewel ik dan metiejne mijzullef de vraoge stelle of er dan ok wel oolde nijlpaarden geboren wordt...  Nijlpaardveulen dan mar...Wat is Taal toch mooi eigenlijk, aj der goed aover naodeenkt! En aover dat teenen zoewng van die jonges uut Daolen bij Margreet Dolman hek ok nog ies nao edacht. Ik bin tot de konklusie ekomen dat het niks veur mij is. Ik zoewge toch liejver elke donderdagmorreng

het een en aander uut de doem...

NAAR 21 T/M 30